प्यूठान । बृहद विजुवार साना शहरी खानेपानी उपभोक्ता तथा सरसफाई संस्थाको आज हुने भनिएको नयाँ कार्यसमितिको निर्वाचनमा असन्तुष्टि जनाउँदै प्रमुख उम्मेदवारहरूले भाग नलिने जनाएका छन्। उक्त संस्थाको विधानअनुसार ३३ प्रतिशत महिला सहभागिता सुनिश्चित हुनुपर्ने प्रावधान गरिएपनी उक्त ब्यवस्था उल्लघंन गरिएको भन्दै उनीहरूले असन्तुष्टि जनाउदै निर्वाचन प्रक्रियामा भाग नलिने जनाएका हुन ।

बृहद विजुवार साना शहरी खानेपानी उपभोक्ता तथा सरसफाई संस्थाको विधानको धारा १४.१ अनुसार ११ सदस्यीय कार्यसमिति रहने ब्यवस्था गरेकोमा सो समितिको बिधानले ३३ प्रतिशत महिला सहभागिता अनिवार्य हुने भनिएको छ । तर बिधान बमोजिम महिला सहभागिता सुनिश्चित नभएकोले सुनिश्चितता नभएसम्म निर्वाचन प्रक्रियामा भाग नलिने उनिहरुको भनाइ छ।

यस अघि निर्वाचन अधिकृतसमक्ष ध्यानाकर्षण गराउँदा पनि सुधार नभएको भन्दै उम्मेदवार भगवती खड्का (उपाध्यक्ष), हिमाल पौडेल (सचिव), रमेश पौडेल (कोषाध्यक्ष) र बाबुराम श्रेष्ठ (सहसचिव) ले आज हुने निर्वाचन प्रक्रियामा भाग नलिने निर्णय गरेका छन् । ‘हाम्रो मागको सुनुवाई भएन।’ रमेश पौडेलले भन्नुभयो, ‘विधानको मर्म तथा भावनाको बर्खिलाप भयो।’ आम उपभोक्ताहरुमा सचेतना जरुरी रहेको उहाँले बताउनुभयो। यद्यपि, उनीहरूले संस्थाका महत्वपूर्ण कार्यहरूमा भने संलग्न रहने बताएका छन ।

बृहद विजुवार साना शहरी खानेपानी उपभोक्ता तथा सरसफाई संस्थाको चैत १७ गते २१औं वार्षिक साधारण सभा तथा आठौं अधिवेशन सम्पन्न भएको थियो । सो अधिबेशनमा संस्थाको नयाँ कार्यसमितिमा सहमति जुट्न नसकेपछि निर्वाचन समितिले निर्वाचन प्रक्रिया अघि बढाइएको थियो। निर्वाचन कार्यतालिका अनुसार आजको लागि निर्वाचन हुने भनिएको छ।